بەپێی هەواڵی کوردپرێس، مەسعوود بارزانی لە پەیامێکدا بڵاوی‌کردەوە، "لەبارەی بارودۆخی کەرکووکەوە ماوەی چەند ڕۆژێکە کۆمەڵێک ڕێگر و گێرەشێوێن بە بیانووی ڕێگری‌کردن لە کردنەوەی بارەگاکانی پارتی دیموکراتی کوردستان لە شاری کەرکووک، ڕێگەی هەولێر و کەرکووکیان گرتووە و ڕێگە نادەن هاوڵاتیان ژیان و هاتوچۆی ئاسایی خۆیان بکەن و دۆخێکی زۆر نالەبار و پڕمەترسیان بۆ خەڵکی کەرکووک دروست کردووە".

راشیگەیاندووە، "ئێمە هەمیشە ئەوەمان دووپات کردوەتەوە کە کەرکووک دەبێت نموونەی پێکەوەژیان و برایەتی و تەبایی نێوان پێکهاتەکانی ئەو شارە بێت بەڵام ئەو ڕەفتارە نابەجێ و نایاساییانە، هەوڵدانە بۆ نانەوەی فیتنە و تێکدانی پێکەوەژیان، جێگەی سەرسوڕمانی زۆریشە کە لەو چەند ڕۆژەی ڕابردوودا هێزە ئەمنیەکان و پۆلیسی کەرکووک بە هیچ شێوەیەک ڕێگریان لەو گێرەشێوێنی و ڕەفتارە نایاساییەی ڕێگرەکان نەکردووە".

بارزانی دەشڵێت، "ئەمڕۆ لەبەرانبەر گەنجان و خۆپێشاندەرانی کوردی کەرکووک، زەبروزەنگ و توندوتیژی بەکار هاتووە و خوێنی گەنجی کورد ڕژاوە، ئەم جۆرە ڕەفتارە بە هیچ شێوەیەک قابیلی قبووڵ نیە و ئەنجامی زۆر خراپی لێ دەکەوێتەوە، ڕشتنی خوێنی ڕۆڵەکانمان لە کەرکووک باجی قورسی دەبێت".

ئاماژەی بەوەش کردووە: "داوا لە سەرۆک وەزیرانی عێراقی فیدڕاڵ دەکەم کە سنوورێک بۆ ئەو ڕێگر و گێرەشێوێنانە دابنێن و کۆتایی بەو ستەم و جیاکاری و ڕێگرییە بهێندرێت کە ڕاستەوخۆ پێکەوەژیان و سەقامگیریی کەرکووک و ناوچەکانی تر دەکاتە ئامانج".