بەپێی هەواڵی کوردپرێس، سەڵاحەدین دەمیرتاش، ھاوسەرۆکی پێشووتری HDP لە پەیامێکدا کە لە ھەژماری تایبەتی خۆی لە تویتەر بڵاوی کردەوە نووسیویەتی: "وەک سۆسیالیستێک کە ساڵانێکە لە پەرلەمان و شەقام و زیندانەکاندا خۆڕاگریم کردووە، ئومێدەوارم ھێزە دیموکراسی خوازەکانی تورکیا بە بەھێزترین شێوە لە پەرلەمانی داھاتوو بوونیان ھەبێت".

داواش لە ھەموو پارتە سۆسیالیست و دیموکراتەکانی تورکیا دەکات، پشتیوانی پارتی چەپی سەوز - یەسەپە بکەن، چوونکە بەدەست‌ھێنانی یەک کورسی زیاتر لە ھەڵبژاردنە پەرلەمانییەکەی ١٤ی ئایاردا ئایندەیان دیاری دەکات.

دەمیرتاش، پەیامێکیشی ئاڕاستەی ھێزە کوردییەکانی کوردستانی تورکیا کردووە و دەڵێت: بانگھێشتی ھەموو لایەنە کوردستانییەکان دەکات کە بە ڕۆحی دیموکراسییەوە لە پارتی چەپی سەوز_دا کۆ ببنەوە، ئومێدەواریشە کورد و سۆسیالیستەکان داواکارییەکەی بێ وەڵام نەھێڵنەوە.

وابڕیارە، ١٤ی ئایار هەڵبژاردنی پەرلەمان و سەرۆک‌کۆماری تورکیا ئەنجام بدرێت.