«شەلال گەدۆ» سەرۆکی پارتی چەپی دیموکراتیکی کوردستانی سووریا و ئەندامی ئەنجومەنی نیشتمانیی کورد لە گفتوگۆ لەگەڵ کوردپرێسدا ئاماژەی دا بە سەردانەکەی جەیمز جێفری نوێنەری تایبەتی ئەمریکا بۆ کاروباری سووریا و کۆبوونەوەی ناوبراو لەگەڵ حزب و ڕەوتە کورڕدییەکاندا و ڕایگەیاند: جەیمز جێفری لەم سەردانەدا پاش کۆبوونەوە لەگەڵ ڕەوتە جیاجیاکاندا بەڵێنی دا ئەو ڕووداوەی کە لە عەفرین و سەرێ کانی و گرێ سپی ڕوویدا چیدی دووپات نابنەوە.

ئەندامەکەی ئەنەکەسە درێژەی دا: ئەمە جاری یەکەمە ئەمریکا بەڵێنی لەم شێوەیە بە کوردی سووریا بدات و ئەمەش دەتوانێت هەنگاوێکی گرینگ بێت بۆ داهاتووی سیاسیی کوردانی سووریا.

شەلال گەدۆ وتیشی: نوێنەری ئەمریکا بڕوای وابوو کە کوردانی سووریا دەگەن بە ڕێککەوتن و یەکگرتنی کورد لای ئەمریکاوە زۆر گرینگە.

سەرۆکی پارتی چەپی دیموکراتیکی کوردستانی سووریا ئاشکراشی کرد: لایەنە کوردییەکان دوو قۆناخی گرینگیان تێپەڕاندووە و گەیشتوونەتە قۆناخێکی هەستیاری دیکە کە لەبارەی بەڕێوەبەردنی ناوچەکە، پرسە سەربازی و ئەمنییەکانەوەیە.

ناوبراو وەبیری هێنایەوە: ئەنجومەنی نیشتمانیی کورد هاوڕای دونیای نوێ و شارستانییەت دەچێتە پێشەوە و بڕوای بە یەک هێزی سەربازی لەژێر چەترێکی سیاسیدایە.

ئەندامەکەی ئەنەکەسە وتیشی: پێشمەرگانی ڕۆژ منداڵانی ئەم میللەتەن و دەبێت هەماهەنگی لەنێوان ئەمان و هێزەکانی سووریای دیموکراتدا دروست بێت و پێکەوە کار بکەن.

کۆدی هەواڵنێر: 60113