کوردپرێس:

ڕاد ساجن هونەرمەند و دەرهێنەری ئوسترالیایی گرێبەستی لەگەڵ دەرهێنەر و ئەکتەر و هاوکارانی فیلمێک واژۆ کردووە کە لە سەر کتێبی "هیچ دۆستێک جگە لە چیاکان" بەرهەمی بێهرووز بووچانی نووسەری پەنابەری کوردی ئێرانی دروست دەکرێت.

بێهرووز بووچانی نووسەری کورد بۆ ماوەی 6 ساڵ لە دورگەی مانوس لە نزیک ئوسترالیا زیندانی کرابوو و لەو ماوەیەدا کتێبی "هیچ دۆستێک جگە لە چیاکان"ی نووسی و سەرکەوتن و دەنگدانەوەی گەردوونیی زۆری بەدەست هێنا. لە ساڵی ڕابردووەوە هەوڵەکان بۆ دروست کردنی فیلمی سینەمایی لەو ڕۆمانە دەستی پێکردووە.

بێهرووز بووچانی لەو پڕۆژە سینەمایییەدا دەوری ڕاوێژکار و یاریدەدەری دەرهێنەری فیلمەکەی دەبێت و ئاکۆس ئارمۆنت وەک دەرهێنەری فیلمەکە دەستنیشان کراوە.

هەروەها گفتوگۆ لەگەڵ فیلمنامەنووسانی جیهانی و دیکەی دەرهێنەرەکانیش بۆ دروست کردنی فیلمەکە بەردەوامە.

فیلمی هیچ دۆستێک جگە لە چیاکان بە هاوکاریی سێ ڕێکخراوی "ئارورا فیلم و هۆدلۆم ئینتێرتینمێنت و سویت شاپ و گرین" بەرهەم دێت.

بێهرووز بووچانی لەو بارەیەوە بە گۆڤاری "سکرین پلەی"ی وتووە کتێبەکەی لە 25 وڵاتی جیهان و بە چەندین زمان چاپ کراوە و خۆی زۆر دەمێکە هەوڵی داوە نوسخەیێک لە کتێبەکەی بۆ دروست کردنی فیلمێک بخاتە بەردەست.

ڕاد ڕاسجەنی ئوسترالیایی هەروەها هاوکاری فیلمێکی دیکەیە لەبارەی کوردەکانەوە کە ناوی فیلمەکە "ڕزگاری"یە و خەباتی کوردەکان دژی داعش لە ساڵی 2014 دەگێڕێتەوە.