کوردپرێس:

ساڵح گەدۆ سکرتێری پارتی چەپی دیموکراتی کوردی سووریا لە لێدوانێکدا ئاماژەی بە ڕاگۆڕینەوە لایەنە کوردییەکانی سووریا کردووە و دەڵێت: دنووستانی ئەنجومەنی نیشتمانیی کوردی سووریا (ENKS) لەگەڵ حیزبەکانی یەکێتیی نیشتمانیی کوردی سووریا (PYNK) لەبارەی ئیدارەی هاوبەشی کوردستانی سووریاوە دەستی پێکردووە و لایەنەکان لەبارەی بڕیارە سیاسییەکانەوە ڕێککەوتوون و گفتوگۆ لەو بارەیەوە کۆتاییی پێهاتووە.

بە گوێرەی نووسراوی ئاژانسی Nerinaazad گەدۆ لە لێدوانەکەیدا ئاماژەی بەوەش کردووە کە تاکە پرسی یەکلانەکراو لە مێکانیزمی بڕیاردانی سیاسی دەگەڕێتەوە بۆ نوێنەرایەتیی ئەو بەشەی کە بەشداریی دانووستانەکەی نەکردووە. لەبارەی نوێنەرایەتیی ئەو 20 لە سەدەش لایەنەکان دەگەنە ڕێککەوتن.

ساڵح گەدۆ ئەوەشی ڕوون کردۆتەوە کە قەرارە سیاسییەکان لە سەر ئیدارەی هاوبەش دراون و دانووستانەکان لەو بارەیەوە ڕەوتێکی ئیجابییان تێپەڕاندووە.