بەپێی هەواڵی کوردپرێس، ئەمڕۆ پێنجشەممە، مستەفا کازمی، سەرۆک وەزیرانی عێراق لە بەغدای پایتەخت پێشوازیی کرد لە ئەمیر فەیسەل بن فەرحان، وەزیری دەرەوەی سعوودیە و شاندێکی یاوەری و تێیدا رایگەیاند: "دەبێت کار بە رێککەوتننامەکانی نێوانمان بکەین و هاوبەشییێک بکەین کە سوودی خەڵکی هەردوو وڵاتی تێدا بێت."

کازمی راشیگەیاند، عێراق و سعوودیە پەیوەندی مێژووییان هەیە و کار بۆ پتەوکردنیشی دەکەن لە داهاتوودا.

لای خۆشییەوە، وەزیری دەرەوەی سعوودیە رایگەیاند کە وڵاتەکەی چاوەڕێی سەردانی مستەفا کازمیە و زۆر بابەتی گرنگ و کاری هاوبەش هەن بۆ تاوتوێ کردن.

سەردانەکەی ئەمڕۆی وەزیری دەرەوەی سعوودیە بۆ عێراق هاوکاتە لەگەڵ ئامادەکارییەکان بۆ سەردانی مستەفا کازمی بۆ ئەو وڵاتە، کە بڕیاربوو ناوەڕاستی مانگی رابردوو سەردانی بکات، بەڵام بەهۆی نەخۆشکەوتنی سەلمان بن عەبدولعەزیزی شای سعوودیەوە، سەردانەکەی دواخرا.

کۆدی هەواڵنێر: 60113