بەپێی هەواڵی کوردپرێس، جاشوا لاندیس لێکۆڵەری پرسەکانی ڕۆژهەڵاتی ناوەڕاست لە زانکۆی ئۆکلاهامای ئەمریکا دەڵێت: ئەمریکا بە ئەنقەست دەستی لەسەر ناوچەی ئابووریی سووریا ناوە بۆیەش باکوور و ڕۆژهەڵاتی سووریای کە لە کونترۆڵی کوردەکاندایە هەڵبژاردووە.

ناوبراو ئاماژە بەوە دەکات کە ئامانجی ئەمریکا لە ئامادەبوون لەناوچەی ژێر کونترۆڵی کوردانی سووریا، کونترۆڵ کردنی گرینگترین بەشی ئابووریی سووریایە و لەمبارەوە بە ماڵپەڕی هەواڵی گری زون-ی وتووە: ناوچەی ژێر کونترۆڵی کوردەکانی سووریا بێ گومان باشترین ناوچەیە لە سووریا و لە ڕاستیدا کانگای زێڕە. ئەم ناوچەیە لێوانلێوە لە نەوت، سەرچاوە ئاویەکان و شوێنی کشت و کاڵە و بەشی سەرەکی بەرهەمی کشت و کاڵ و کارەبای سووریا لەم ناوچەیە دابین دەکرێت.

لێکۆڵەری پرسەکانی ڕۆژهەڵاتی ناوەڕاست بڕوای وایە لە کۆتاییدا بێ گومان ئەمریکا ناوچەی ژێر کونترۆڵی کوردەکان چۆڵ دەکات و پاشان بێ وەستان حکوومەتی ناوندیی سووریا و تورکیا بۆ کونترۆڵی ئەم ناوچەیە ڕکابەری دەکەن. بۆیە باشتر وایە کوردەکان لەمبارەوە لەگەڵ حکوومەتی ناوەندی ڕێککەون.

جاشوا لاندیس لە کۆتاییدا دەڵێت: ڕاستە کە کوردەکانی سووری خوازیاری جیابوونەوە لەو وڵاتە نین بەڵام بێ گومان بەتەمای دامەزراندنی کیانێکی سەربەخۆن. بەم حاڵەشەوە ژێرخانی پێویست بۆ دامەزراندنی کیانی سەربەخۆ لە ناوچەی کوردستانی سووریا بوونی نییە و لە نەتەوەیەکگرتووەکانیشدا کەس ئامادە نییە دەنگی پێبدات.

کۆدی هەواڵنێر: 60113