بەپێی هەواڵی کوردپرێس، تیمەکانی فریاگوزاریی دەریاوانی لە دەریاچەی وان بەردەوامن لە گەڕان بەدوای تەرمی ئەو کۆچبەرانەی لە ئەنجامی نوقم بوونی بەلەمەکەیان لە 27ی حوزەیرانی رابردوودا لە ئاوی دەریاچەکەدا خنکان و ئێوارەی شەممە 25ی تەمموزی 2020 تەرمی کۆچبەرێکی دیکەیان لە دەریاچەی وان هێنایە دەرەوە. بەوەش ژمارەی ئەو تەرمانەی تاوەکوو ئێستا دۆزراونەتەوە گەیشتە 61 تەرم.

زۆربەی ئەو کۆچبەرانەی لە دەریاچەی وان خنکان، ئەفغانی، پاکستانی و ئێرانی بوون و ناسنامەی بەشێکی دیکەشیان هێشتا ئاشکرا نەکراوە.

کۆچبەرەکان بە رێگەی نایاسایی سنووریان بەزاندووە و دوای گەیشتنە پارێزگای وانی کوردستانی تورکیا هەوڵیان داوە بە قاچاخ لە دەریاچەی وانەوە خۆیان بگەیێننە ناوچەکانی دیکەی تورکیا.

لە چەند رۆژی رابردوودا لە قووڵایی 106.5 مەتر بەلەمە ژێرئاو کەوتووەکە لە دەریاچەی وان دۆزرایەوە. پەیوەست بەو رووداوە تاوەکو ئێستا پێنج کەس زیندانی کراون، دوو کەس دەستبەسەر کراون، سێ کەس بە مەرج و چوار کەسی دیکەش دوای وەرگرتنی گوتەکانیان ئازادکراون.

کۆدی هەواڵنێر: 60113