بەپێی هەواڵی کوردپرێس،ماوەی چەند مانگە تورکیا هێرشەکانی بۆ سەر هەرێمی کوردستان چڕ کردۆتەوە و ڕایگەیاندووە ئامانجی ئەو هێرشانە بەرەنگاربوونەوەی پارتی کرێکارانی کوردستانە.

گۆڤاری نیوئینتێرناشناڵیست لەبارەی ئامانجەکانی تورکیا لە هێرشکردنە سەر هەرێمی کوردستان دەنووسێت: تورکیا لە هێرشەکانیدا ناوچە گوندنشینەکان، ناوچەی ئێزدی نشینی شەنگال و تەنانەت چەند گوندێکی ئاشووری کردۆتە ئامانج و بۆ ئەم کارەیش مەبەستێکی هەیە.

گۆڤارەکە ئاماژە دەکات بە داگیر کردنی چەند ناوچەیێکی کوردستانی سووریا و هەروەها هێرشکردنە سەر هەرێمی کوردستان لەم دواییانەدا، لەلایەن تورکیاوە و دەڵێت ئەو هێرشانە پێشتر کەم وێنە بوون و تورکیا هەوڵ دەدات دووبەرەکی بخاتە نێوان کوردانی عێراق و سووریا و تورکیا و ئەو جیاوازییە لە بواری جۆگرافی و سیاسیەوە زیاتر بکاتەوە.

جان لوبوک، نووسەری یادداشتەکە بڕوای وایە تورکیا لەم هێرشانە دوو ئامانجی سەرکیی هەیە: ئەم وڵاتە دەیهەوێت ڕێگر بێت لەبەردەم یەکگرتن و بەهێز بوونی کورد و دووهەم ڕێگری بکات لە سەربەخۆیی کوردەکان.

نیوئینتێرناشناڵیست لە درێژەدا ئاماژە دەکات بەو بابەتەی کە حکوومەتی هەرێمی کوردستان و حکوومەتی ناوەندیی عێراق توانای ڕێگری کردن لە هێرشەکانی تورکیایان نییە.

کۆدی هەواڵنێر: 60113