کوردپرێس:

ماڵپەڕی لیژنەی پێوەندییەکانی دەرەوەی ئەنجومەنی نوێنەرانی ئەمریکا ڕایگەیاند مایکڵ مەک کاڵ و ئێلیۆت ئەنگڵ دوو نوێنەری بەرجەستەی ئەنجومەنی نوێنەرانی ئەمریکا لەگەڵ جێم ڕیش و باب مەنەندز دوو نوێنەری باڵای ئەنجومەنی پیرانی ئەو وڵاتە داوایان لە مایک پەمپیۆ وەزیری دەرەوە کردووە دەروازەی سنووری یەعروبیە لە نێوان عێراق و سووریا بکەنەوە.

ئەو چوار نوێنەرە لە نامەکەیاندا بە وەزیری دەرەوەی ئەمریکایان وتووە دەروازەی سنووری یەعروبیە بە دەنگی چین و ڕووسیا لە ئەنجومەنی ئاسایشی نەتەوەیەکگرتووەکان داخرا بەڵام پێویستە ئەمریکا ئەو دەروازەیە بکاتەوە لەبەر ئەوەی دەروازەی ناردنی یارمەتیی مرۆڤدۆستانە بۆ کوردستانی سووریا و ناوچەکانی ژێر دەسەڵاتی کوردی ئەو وڵاتەیە.

چوار نوێنەرەکە داوایان کردووە ئەمریکا لە نەتەوەیەکگرتووەکانی دەسەڵاتی ڤیتۆکردنی بڕیارەکە بەکار بهێنێت چوونکە کەلوپەل و جیهازی پزیشکی و تەندروستی لە سووریا کەمە بۆیە لانی کەم بۆ یەک ساڵ پێویستە دەروازەی یەعروبیە بکرێتەوە بۆ ئەوەی لە قۆناغی بڵاوبوونەوەی کۆرۆنادا یارمەتیی پزیشکی و تەندروستی بگاتە دەستی هاووڵاتییانی سووری و بەتایبەتی کوردەکانی ئەو وڵاتە.