بەپێی هەواڵی کوردپرێس، مەزڵووم کۆبانی فەرماندەی گشتیی هێزەکانی سووریای دیموکرات لە ساڵۆگەڕی داگیرکردنی عەفرین لەلایەن سوپای تورکیا و گرووپە چەکدارەکانی نزیک لە ئەنقەرەوە رایگەیاند: لەسەرجەم گفتوگۆکانیاندا لەگەڵ کۆمەڵگای نێودەوڵەتی پرسی کانتۆنی عەفرین لە پێشینەی کارەکانیان دەبێت و پێویستە کار بۆ گەڕانەوەی دانیشتوانە رەسەنەکان بۆ ئەو ناوچەیە بکرێت.

فەرماندەی گشتیی هێزەکانی سووریای دیموکرات (هەسەدە) لە هەژماری خۆی لە تویتەر ئاماژەی بەوەش کردووە: "عەفرین لە کاتی کارکردنماندا لەگەڵ کۆمەڵگای نێودەوڵەتی لە پێشینەی کارەکانمان دەبێت، هەروەها گەڕانەوەی دانیشتوانە رەسەنەکەی و رۆیشتنی ئەو کەسانەی نامۆن لەو شارە ناونیشانی کارەکەمان دەبێت".

مەزڵووم کۆبانی، ئاماژەی بەوەش کردووە "پێویستە لەسەر کۆمەڵگای نێودەوڵەتی چارەسەری ئەو پێشێلکاری و تاوانانەی جەنگ بکات کە بەشێوەی رۆژانە لە عەفرین ئەنجام دەدرێن".

ئەمڕۆ دوو ساڵ بەسەر داگیرکردنی کانتۆنی عەفرین لەلایەن هێزەکانی سوپای تورکیا و گرووپە چەکدارییەکانی ئۆپۆزسیۆنی سووریا تێدەپەڕێت بە گوێرەی ئامارەکانی روانگەی سووری بۆ مافەکانی مرۆڤیش لە ئەنجامی کۆنتڕۆڵ کردنی کانتۆنی عەفرین لەلایەن هێزەکانی سوپای تورکیاوە زیاتر لە 350 هەزار کەس کە دانیشتوی رەسەنی گوند و شارۆچکەکانی ئەو سنوورەن ئاوارەبوون، هاوکات رێکخراوە مرۆییەکان ئەنقەرە بە ئەنجامدانی پاکتاوی رەگەزی و گۆڕینی دیمۆگرافی لە عەفرین تۆمەتبار دەکەن.

کۆدی هەواڵنێر: 60113