بەپێی هەواڵی کوردپرێس، لە کەمپەکانی هەرێمی کوردستان بە هەزاران ئاوارە و پەنابەری عێراق و سووریا هەیە، لەگەڵ دەرکەوتنی ڤایرۆسی کۆرۆنا و دەرچوونی ڕێنماییەکان بۆ خۆپارێزی، ڕێنماییەکان لەوێش جێبەجێ کراون.

دەربارەی دۆخی ژیانی ئاوارە و پەنابەران، بابە ڕەسوڵ غەفور، بەڕێوەبەری نووسینەگەی هەماهەنگی قەیرانەکان بە ڕۆژنیوزی وتووە، ئێستاش هاوشێوەی ڕۆژانی ئاسایی خواردن و پێداویستیەکانی دیکە لەلایەن ڕێکخراوە جیهانییەکان و وەزارەتی کۆچوکۆچبەرانی عێراقەوە بەسەر ئاوارەکاندا دابەش دەکرێت.

هەروەها بۆ خۆپاراستنی دانیشتووانی کەمپەکان لە کۆرۆنا، دەمامەک و دەستکێش لە نێوانیاندا دابەش کراوە.

بابە ڕەسوڵ غەفور وتیشی: ئێستا ئاوارە و پەنابەرەکان ناتوانن بگەڕێنەوە شوێن و زێدی خۆیان، هەروەها پەنابەر و ئاوارەکان لە ماڵەکانی خۆیاندا کەرەنتینە کراون ڕێگە بە هاتووچۆ نادرێت، ئەمەش لە پێناو سەلامەتی گیانیان تا بپارێزرێن لە تووشبوون بە کۆرۆنا.

کۆدی هەواڵنێر: 60113