بەپێی هەواڵی کوردپرێس، سۆزدا ئەحمەد لە بەرپرسانی بەڕێوەبەرایەتی خۆسەری کوردی لە باکووری سووریا بە ئەلمۆنیتۆری وتووە کە سەربزیوانی سەربە تورکیا ڕۆژی 24ی فێبریوێری وێستگەی ئاوی سەرێ کانییان داخستووە و کارمەندانی ئەو وێستگەیەشیان دەر کردووە. کە بەو هۆیەوە ئاوی خواردنی حەسەکە و تەل تەمەر و کەمپەکانی شەدادی و ئەلهۆل و چەند ناوچەی دیکە پچڕاوە.

فابریس بالانشە شرۆڤەکاری بابەتی سووریا ئاماژەی بە پشتگیرییەکانی تورکیا لەو سەربزیوانە دا و بە ئەلمۆنیتۆری وت: تورکیا پێشتر لە ئاو وەکوو چەکێک دژ بە سووریا کەڵکی وەرگرتووە و ئەگەری ئەوەش هەیە دووبارە ئەو کارە بکات.

بەرپرسێکی نەتەوەیەکگرتووەکان لە گفتوگۆ لەگەڵ ئەلمۆنیتۆردا ئاماژەی بە کاریگەریی داخستنی وێستگەی سەرێ کانی لەسەر ژیانی نیو ملیۆن کەس داوە و ڕایگەیاند: ڕێکخراوەکانی سەربە نەتەوەیەکگرتووەکان دەستیان کردووە بە دابەش کردنی ئاوی خواردن لە چەند ناوچەیێکی باکووری سووریا.

کۆدی هەواڵنێر: 60113