بەپێی هەواڵی کوردپرێس، گۆڤاری ئەلمۆنیتۆر بڵاوی کردەوە، ڕەجەب تەییب ئەردۆغان سەرۆک کۆماری تورکیا بۆ ئەوەی لە هەڵبژاردنەکاندا سەرکەوتن بەدەست بهێنێت دەیەوێت پارتی دیموکراتی گەلان یان (هەدەپە) هەڵبوەشێنێتەوە.

بەڵام قەدری گۆرسێل شرۆڤەکاری سیاسی پێی وایە ئەم حزبە کوردییە کە لە ڕابردوودا توانی بە شکاندنی بەربەستی 10% بچێتە ناو پەرلەمانەوە، ئەگەر تەنانەت چالاکییەکانی قەدەغە بکرێن، دەتوانێت تەحەدای حکوومەتی ئێستا بکات.

ناوبراو ئاماژی دا بەوەی کە پارتی دیموکراتی گەلان نوێنەری بزووتنەوەیەکە کە چەندین جار چالاکیی پارتەکانی ئەو جووڵانەوە لە تورکیا قەدەغە کراون و ڕایگەیاند: ئەم پارتە ئەگەر لەلایەن سیستەمی دادوەریی تورکیاوە هەڵبوەشێتەوە دەتوانێت چەند ڕێگاچارە لە دژی قەدەغە کردنی چالاکییەکانی و ئەندامەکانی بدۆزێتەوە.

قەدری گۆرسێل ڕوونیشیکردەوە، پارتی دیموکراتی گەلان دەتوانێت لە ڕێگەی پارتەکانی ترەوە یان بەشێوەی سەربەخۆ بەشداری هەڵبژاردنەکانی تورکیا بکات.

ناوبراو جەختیشی لەوە کردەوە کە هەدەپە دەتوانێت تۆڵە لە حکوومەتی تورکیا بکاتەوە و سزای حکوومەتی ئەردۆغان بدات ئەوەش لەڕێگای پشتیوانی کردن لە کاندیدەکانی ئۆپۆزسیۆن لە ناوچە هەستیارەکاندا.