«حوسێن مەستۆ» ئەندامی مەکتەبی سیاسیی پارتی دیموکراتی کوردی سووریا (الپارتی) لە گفتوگۆ لەگەڵ کوردپرێسدا ئاماژەی دا بە بڕینی ئاوی ناوچەی حەسەکە لە باکوور و ڕۆژهەڵاتی سووریا لەلایەن تورکیاوە و ڕایگەیاند: ئەمە جاری یەکەم نییە کە تورکیا وەها هەڵمەتێک دەدات و ئاو بەڕووی یەک ملیۆن مرۆڤدا دەبڕێت. ئەمەش شەرمەزاری و ڕیسوا بوونێکی گەورەیە بۆ تورکیا و ئەو زلهێزانەی کە ئەمڕۆ لە باکوور و ڕۆژهەڵاتی سووریان.

ناوبراو زیاتر دەڵێت: هەروەها هاوپەیمانان بەرپرسن لەم ڕیسواییەدا و بەتایبەت ئەمەریکا و ڕووسیا کە خۆیان بە خاوەنی سووریا دەزانن.

حوسێن مەستۆ زیادی کرد: ئێمە دەنگی خۆمان بە هەموو جیهان دەگەیێنین و دەڵێین ئەو دەوڵەتانەی کە ئەمڕۆ لە خاکی سووریان ڕێگاچارەیێک لەبەرامبەر سیاسەتی دژە ئینسانیی تورکیا بدۆزنەوە. تورکیا هاوبەشی ستراتێژیی ئەوانە و ئەم سیاسەتە نادروست و نامرۆڤانەیە و پێویستە گوشاری بخرێتە سەر.

ناوبراو وەبیریشی هێنایەوە ئامانجی تورکیا لەم چەشنە هەوڵە سیاسی و ئابوورییە و ئەمریکایش و ڕووسیاش بەرپرسن لەم سیاسەتە ناپاکەی تورکیا.

حوسێن مەستۆ ئەندامی مەکتەبی سیاسیی پارتی دیموکراتی کوردی سووریا ئاماژ‌ەی بە پێگەی تورکیا لە هاوپەیمانیی ناتۆ دا و وتی: تورکیا بەشێکە لە ناتۆ کە پێبەندی ئەو یاسایانەیە مافیان دیاری کردووە و دژی ئەوەن خەڵکی مەدەنی بکرێنە ئامانج، بۆیە دەبێت ئەم پرسیارە بکرێت بۆچی تورکیا درێژەی بەم ڕەفتارە دەدات؟

ئەندامەکەی الپارتی جەختی کردەوە: تورکیا و ئۆپۆزیسیۆنی سووریا کە ئەرتەشی ئازادیش لەنێویاندایە دەیانهەوێت زەبر لە کورد بدەن بۆیە بە بڕینی ئاو دەیانهەوێت گوشاری زیاتر بخەنە سەر خەڵکی حەسەکە.

ناوبراو وتیشی: ئێمە وەکوو مەکتەبی سیاسیی پارتی دیموکراتی کوردی سووریا لە هەموو ئەو گرووپانەی لەم سیاسەتە دەوریان بینیوە بە تایبەت لە ئەمەریکا و ڕووسیا داوا دەکەین دەست لەم سیاسەتە هەڵبگرن و یاری بە گیانی یەک ملیۆن مرۆڤ لە حەسەکە نەکەن چوونکە لە حەسەکە جگە لە کورد عەرەب و ئەرمەنی و تورکمان-یش دەژین.

کۆدی هەواڵنێر: 60113