بەپێی هەواڵی کوردپرێس، ڕوکەن جەمال، وتەبێژی ناوەندی ڕاگەیاندنی یەکینەکانی پاراستنی ژنان (یەپەژە)، لە لێدوانێکدا بۆ ماڵپەڕی فەرمیی یەپەژە، سەبارەت بە داهاتووی ناوەندەکە وتی: "لە مانگی نیسان لەگەڵ مورهاف ئەبو قەسرە، وەزیری بەرگریی حکوومەتی کاتیی کۆبوونەوەمان کردووە، ئێمە ڕەشنووسێکمان سەبارەت بە بۆچوون و پێشنیازەکانمان بەشێوەی نووسراو پێشکەش کردبوو، بەڵام تائێستا هیچ پێشنیاز یان بڕیارێکی فەرمی لەلایەن بەرپرسانی دیمەشقەوە بە ئێمە نەگەیشتووە".

ڕوکەن وتیشی: "چەند بۆچوونێک هەن بۆ ئەوەی یەپەژە وەک هێزێکی تایبەت و سەربەخۆی دژەتیرۆر لەناو وەزارەتی ناوخۆدا جێگیر بێت، بەڵام تائێستا نەگەیشتوونەتە بڕیارێکی ڕوون و کۆتایی".

وتەبێژی ناوەندیی یەپەژە وتیشی: "لە ڕۆژانی داهاتوودا بۆ تاوتوێکردنی ئەم پرسە، لەگەڵ بەرپرسانی دیمەشق کۆ دەبنەوە، تا ئەو کاتەی میراتی یەپەژە دەخەینە ژێر گرەنتی و پارێزبەندییەکی یاساییەوە، تێکۆشان و خەباتمان بەردەوام دەبێت".