بەپێی هەواڵی کوردپرێس، نەزهەت حالی بەڕێوەبەری پێشووی ئاژانسی پاراستن ئاماژەی بەوە داوە، بە داخەوە وەکوو تێبینی دەکرێت بۆ چارەسەر کردنی کێشە و گرفتەکان، زۆربەی سیاسەتوانان زیاتر لەهەر کەناڵ و ڕێگایەکی دیکە پشت بە ئامرازی میدیا و سۆشیال میدیا دەبەستن. لەکاتێکدا ئەم مینبەرانە نەک هەر نەیانتوانیوە کێشەکان چارەسەر بکەن بەلکوو قووڵتریان کردۆتەوە.

دەقی بڵاوکراوکەی نەزهەت حالی:

دیتن و بیستنی ڕاستییەکان ئازایەتی و مەردایەتی گەرەکە

نەزهەت حالی

بارودۆخی هەنوکەیی عێراق و هەرێمی کوردستان

لە چەندین ڕووەوە  باش نییە و ڕۆژ لە دوای ڕۆژ کێشە و گرفتەکان لە هەڵکشانن.

دیارە ئێمە بارودۆخی هەرێمی کوردستانمان زیاتر لا مەبەستە کە بە داخەوە لە ئێستادا بەرەو پووکانەوەی ناوخۆیی دەچێت، بە تایبەتی لە ڕووی ئابووری و سیاسییەوە، سیاسەتمەدارە بڕیار بەدەستەکانیش خۆیان لە قەرەی دانپێدانان بەو ڕاستییە مەترسیدارە نادەن. هەر بۆیەش ناتوانن چارەسەری بۆ بدۆزنەوە.

هەروەها بڵاو بەنەوەی پەتای تەمەلوق و پێدا هەلگوتنی ناڕاست و بێ مانا سەری نەک تەنیا لە سیاسەتوانان بەڵکوو لە خەلکیش شێواندووە.

لە ئێستادا  پێوەری لێ هاتوویی و کارامەیی و دلسۆزی بووەتە زۆرترین و خەستترین ماستاو کردن، عەرەب گوتەنی (تملق لتتسلق) بووەتە هونەر و ڕێگای وەرگرتنی پۆست و امتیازات، کە بلاو بوونەوەی ئەو پەتایە و  بە دیاردە بوونی و زۆری ماستاوچییەکان، مەترسییە لەسەر کۆمەلگا و سیستەمی سیاسیمان. لەبەر ئەوەی ئەم گرووپە لەسەر حسابی بەرژەوەندی گشتی تەنیا بۆ  بەرژەوەندی خۆیان هەوڵدەدەن و باکیان بە ئایەندەی وڵات و تەنانەت خودی ئەو بەرپرسەش نیە کە لە تەمەلوق کردن بۆی ریکۆردیان شکاندووە و لە فەرهەنگی ئەواندا قیەمی وەفا و ولا‌و  بوونی نییە.

دەبوایە لە ئێستادا  کاری هەرە لە پێشینەی سیاسەتمەدارە بڕیار بە دەستەکان، ئاشتکردنەوەی لایەنە سیاسییەکان لە گەڵ یەکتری و چارەسەر کردنی کێشە و گرفتەکان بوایە، بۆ ئەوەی بۆ پالپشتی کردن لە حکوومەت و دامەزراوە فەرمییەکان لە بەرانبەر بەغدا،  بەرەیەکی نیشتمانی یەکگرتوومان هەبوایە. سەرکردەکان دەبێت ئەو ڕاستییەیان لەبەر چاو بێت ئەو کارە باشانەی ئەمڕۆ دەتوانن ئەنجامی بدەن، ڕەنگە بەیانی و لە ئایەندەدا ئەو دەرفەتەیان بۆ نەڕەخسێت.

بە داخەوە وەکوو تێبینی دەکرێت بۆ چارەسەر کردنی کێشە و گرفتەکان، زۆربەی سیاسەتوانان زیاتر لەهەر کەناڵ و ڕێگایەکی دیکە پشت بە ئامرازی میدیا و سۆشیال میدیا دەبەستن. لەکاتێکدا ئەم مینبەرانە نەک هەر نەیانتوانیوە کێشەکان چارەسەر بکەن بەڵکوو قوولتریان کردۆتەوە.

وێڕای لایەنی ئەرێنی کەناڵی میدیایی و تۆڕەکۆمەڵایەتیەکان بەگشتی ،ئەم سەکۆیانە دەرفەتن بۆ ماستاوچییەکان هەر کات بیانەوێت و چەندی دوریش بن خۆیان بخزێننە ناویان، بە پێچەوانەی قۆناغی ڕابردوو، كه پێدا هەڵدان و  تەمەلوق ڕاستەوخۆ ڕووبەڕوو دەکرا.

دیارە ئەو دیاردە ناشرین و پەتا وێرانکەرە، دیاردەیەکی تازە نیە و ماستاوچییەکان لەدێرزەمانەوە بەدەوری دەسەڵاتداران دەخولێنەوە.

بۆنموونە ماکیاڤیلی لە کتێبی (میر) ئامۆژگاری میر دەکات کە خۆی لە ماستاوچییەکان بپارێزێت.

هەروەها دەگێڕنەوە کە لە سەردەمی  لویسی  چواردەدا دارودەستەی پاشای فەرەنسا لە دەور و بەری کۆ دەبوونەوە و دەستیان دەکرد بە مەدح و سەنای خاوەن شکۆ، جارێک پاشا پرسیار لە یەکێک لە ئامادە بووان دەکات کە هاوسەرەکەی دوو گیان بووە و دەپرسێت: کەی هاوسەرەکەت منداڵی دەبیت، ئەویش لەوەڵامدا وتوویەتی :کەی خاوەن شکۆ بیەوێت منداڵی دەبێت.

دیارە وێڕای مەترسی پەتای تەمەلوق، تەنیا گوتنی راستییەکان ئازایەتی و دڵسۆزی ناخوازێت، بیستن و بینینی ڕاستییەکانیش  لە لایەن دەسەلاتداران مەردایەتی و  بوێری گەرەکە.  زۆر جار دەسەڵاتداران لە ناو کۆشک و تەلارەکانیان بە هەلپەرست و موتمەلقەکان دەور دەدەرێن و هالەیەک و دونیایەکی ناڕاستیان بۆ دروست دەکەن کە دڵخوازی دەسەلاتدارانە، بیستنی ڕاستییەکان ئەو هالەیە لە ناو دەبات، وێنەی جیهانە جوان  و خوازراوەکەی خەیاڵیان دەشێوێنێ، ڕاستییەکان بە هەموو دیوە خوار و پڕ لە گرفت و کەموکوڕییەکان  بە دیار دەخات. هەر بۆیەش بیستن و بینینی ڕاستییەکان ئازایەتی زیاتری پێویستە.  ئەرکی دەسەڵاتدارە کە ئازایەتی لە بڕیاردانی دروست و کرداری ڕاستەقینەی هەبێت، تەنانەت  ئەگەر پێویست بکات لە خۆی و لە ئازیزەکانی دەست پێ بکات.  بۆیە جەخت لەو ڕاستیە دەکەینەوە لە هەموو بارودۆخیکدا هەنگاوی یەکەم بۆ چارەسەرکردنی گرفتەکان لە ئازایەتی بیستن و بینینی ڕاستییەکانە، پاشان لە دان نانه بە هەڵەکان.