بەپێی هەواڵی کوردپرێس، ئاژانسی ھەواڵی رۆیتەرز لەزاری چەند سەرچاوەیەکەوە بڵاویکردەوە، ڕێککەوتنی نێوان ھەرێم و بەغداد لەسەر دەستپێکردنەوەی ھەناردەی نەوتی ھەرێم، ڕەوانەی محەمەد شیاع سوودانی سەرۆک وەزیرانی عێراق کراوە بۆ ئەوەی ڕەزامەندی کۆتایی لەسەر بدرێت و پێدەچێت رۆژی دووشەممەش ڕێککەوتنەکە لەلایەن لایەنێکی ڕەسمییەوە پشتڕاست بکرێتەوە.

ڕۆیتەرز ئاماژەی بەوە کردووە، تورکیا دەیەوێت پێش دەستپێکردنەوەی ھەناردەی نەوتی ھەرێم بۆ بەندەری جیھان، دۆسیەی دووەمی ناوبژیوانی پەیوەست بە رێککەوتنی ساڵی ١٩٧٣ کە لە ساڵی ٢٠١٨وە بە کراوەیی ماوەتەوە، یەکلایی بکرێتەوە و ئەوش پێدەچێت نزیکەی دوو ساڵ بخایەنێت.

سەرچاوەکان ئەوەشیان بە ڕۆیتەرز ڕاگەیاندووە، تا ئێستا تورکیا لە رێککەوتنی سەرەتایی نێوان حکوومەتی ھەرێم و حکوومەتی عێراق ئاگادار نەکراوەتەوە و گفتوگۆکان لەوبارەیەوە بەردەوامن.