«نافێع عەبدوڵڵا» ئەندامی کۆمیتەی ناوەندیی پارتی دیموکراتی کوردستانی سووریا (PDK.S) لەە گفتوگۆ لەگەڵ کوردپرێسدا ئاماژەی دا بە دانوستانەکان لەنێوان ئەنەکەسە و پەیەدە و وتی: گفتوگۆکان لەنێوان ئێمە (ئەنجومەنی نیشتمانی) و حزبەکانی یەکێتیی نیشتمانی درێژەیان هەیە و هێشتا نەگەیشتووینەتە میکانیزمێکی هاوبەش بەڵام لەسەر ئیداری هاوبەشی پەنجا- پەنجا بەپێی ڕێککەوتنەکەی 2014ی دهۆک دانوستانەکان درێژەیان هەیە.

نافێع عەبدوڵڵا زیادی کرد: لەبارەی بابەتی سەربازی و گەڕانەوەی هێزەکانی پێشمەرگەی ڕۆژ ئێمە لەسەر بنەمای هەمان ڕێککەوتنی دهۆک کار دەکەین. بۆیەش پێویستە دەستەیێکی پسپۆڕ لەبارەی تێکەڵ بوونی دوو هێزی پێشمەرگەی ڕۆژ و هێزەکانی سووریای دیموکرات پێکبڵێندرێت و پرسە تەکنیکییەکان تاوتوێ بکرێن کە هێشتا ئەم بابەتە ئەنجام نەبووە.

ئەندامی کۆمیتەی ناوەندیی پارتی دیموکراتی کوردستانی سووریا (PDK.S) ئاشکراشی کرد: ئێمە پێوەندیمان لەگەڵ حکوومەتی ناوەندی نییە و پەیەدە لەگەڵ حکوومەت گفتوگۆ دەکات بەڵام ئێمە (ئەنەکەسە) لەچوارچێوەی ئۆپۆزیسیۆندا لە ژێنێڤ لەگەڵ حکوومەتی ناوەندیی سووریا گفتوگۆ دەکەین.

ناوبراو جەختی کردەوە: تا ئەم کاتە حکوومەتی ناوەندیی هیچ باوەڕێکی بە مافی گەلی کورد لە سووریا نەبووە و هیچ هەنگاوێکیشی لەمبارەوە هەڵنەگرتووە.

کۆدی هەواڵنێر: 60113