گۆڤاری ئەمریکی کرەدڵ لە ڕاپۆرتێکدا باس لە کاروانێکی دیکەی نەوتهەڵگر دەکات کە هەفتەی ڕابردوو لەناوچەی ژێر دەسەڵاتی کوردەکانی سووریاوە بەرەوە هەرێمی کوردستانی عێراق بەڕێکەوتووە. بەگوێرەی ڕاپۆرتەکە، ڕۆژی 11ی نیسان، هێزەکانی ئەمریکا لانیکەم 34 تانکەری نەوتیان لە ناوچەی ژێر دەسەڵاتی کوردەکانی سووریاوە بۆ عێراق گواستووەتەوە.

ئەم گۆڤارە لە درێژەدا باس لە گواستنەوەی نەوتی سووریای لەلایەن هێزەکانی ئەمریکاوە بۆ کۆمپانیای کارگرووپ لە هەرێمی کوردستان و پاشان پاڵاوتن و گواستنەوەی بۆ بنکە ئەمریکییەکان لە عەین ئەسەد و هەڵەبجە دەکات.

بەم پێیەش، نەوتی ناوچەی ژێر دەسەڵاتی کوردەکانی سووریا، بە یاوەریی هێزەکانی ئەمریکا، لە ڕێگەی سێ دەروازەوە دەچێتە هەرێمی کوردستانی عێراق. ئەم گۆڤارە ئیدیعای ئەوەشی کردووە کە هەموو هەفتەیەک لانیکەم یەک وجبە نەوت لە ناوچەکانی ژێر کۆنترۆڵی کوردەکانی سووریاوە بۆ هەرێمی کوردستانی عێراق دەگوازرێتەوە.