«نافێع عەبدوڵڵا» ئەندامی کۆمیتەی ناوەندیی پارتی دیموکراتی کوردستانی سووریا (PDK.S) لە گفتوگۆ لەگەڵ کوردپرێسدا ئاماژەی دا بە وتەکانی ئەم دواییەی "سعوود مەلا" سکرتێری حزبەکەی لەباەری کشانەوەی گریلاکانی پەکەکە لە باکووری سووریا و وتی: ئەم پرسە بەسراوە بە ئاسایشی کوردستانی سووریاوە و بۆ ئەوەی کە هەڕەشەکانی تورکیا بۆسەر باکووری سووریا کۆتایی پێبێت دەبێت پارتی یەکێتی دیموکراتیک (PYD) و پارتی کرێکارانی کوردستان (PYD) پێوەندییان پێکەوە نەمێنێت.

ناوبراو زیادی کرد: تا ڕادەیێک قۆناخی دووهەمی دانوستانەکان لەنێوان ENKS و PYNK کۆتایی هاتووە و لایەنەکان سەرقاڵی گفتوگۆن بۆ دەست پێکردنی قۆناخی سێهەم و پرسی بەڕێوەبردنی کوردستانی سووریا-ن.

نافێع عەبدوڵڵا زیاتر وتی: هەموو ڕۆژە هەڕەشەکانی تورکیا بۆسەر کوردستانی سووریا بوونی هەیە و ئێمە و ئیمریکییەکان و تەنانەت "ژەنراڵ مەزڵووم کۆبانێ" بە دوای دەرەچەیێکداین کە زاڵ بوونی پەکەکە بەسەر پەیەدە کۆتایی پێبێت و ئەم دوو حزبە پێوەندییان نەبێت.

کۆدی هەواڵنێر: 60113