کوردپرێس:

سولەیمان جەعفەری هاوسەرۆکی ئەنجومەنی یاسادانانی کانتۆنی عەفرین لەبارەی دوایین پێشهاتەکان لە ناوچەی داگیرکراوی عەفرین کە لە لایەن تورکیا و گرووپە جیهادییەکانەوە داگیر کراوە بە کوردپرێسیوتووە: گۆڕینی دیموگرافیای عەفرین ئێستاش بەردەوامە و بە خێرایی لە لایەن تورکیا و گرووپە جیهادییەکانی سەر بەو وڵاتەوە ئەنجام دەدرێت و ڕۆژانە دەستدرێژی کوشتنی جەماوەری و دەستبەسەرکردن و ئەشکەنجەدان و بێ حورمەتی کردن بە ژنان بەردەوامە.

ناوبراو ئەوەشی بە کوردپرێس وتووە کە لە ناوچەی شەهباش 90 هەزار پەنابەری عەفرینی لە کەمپەکان دەژین و ئەو ناوچەیە کێشەی زۆریان هەیە. نەبوونی دەرمان و نەبوونی نان و ئارد کێشە سەرەکییەکانن. دەوڵەتی سووریاش ڕێگە نادات کەلوپەلی پێویست و خواردەمەنی بە ئاسانی بگاتە پەنابەران و پەنابەرانی عەفرین لە چەندین لاوە گەمارۆ دراون.

سولەیمان جەعفەر گوتیشی: تورکیا نیازیەتی وەک عەفرین، شەهباش داگیر بکات و تورکیاش و ڕووسیاش هەردووک نیازیانە ئێمە دەست لە شەهبا هەڵبگرین و ڕۆژانە هەڕەشە لە پەنابەران دەکەن.

هاوسەرۆکی ئەنجومەنی یاسادانانی کانتۆنی عەفرین زیادیشی کردک ئێمە وەک پەنابەرانی عەفرینی لە شەهبا دەمێنینەوە و سوێندمان خواردووە یان بە سەربەرزی دەگەڕێینەوە عەفرین و یان خود لە شەهبا دەمرین.