«لوورنس سولەیمان» ڕۆژنامەوانی سووری لە گفتوگۆ لەگەڵ کوردپرێسدا ئاماژەی بە گۆڕانکارییەکانی ئیدلیب دا و وتی: سوپای تورکیا بە شێوەیێکی ئاشکرا و جیاواز لە ڕابردوو پشتگیری لە تیرۆریستان دەکات و بێ ترس هاتۆتە ناو خاکی سووریاوە.

ناوبراو درێژەی دا: پێچەوانەی هەڕەشە دەمییەکانی ئەردۆغان هەموو ڕۆژێک ژمارەیێک سەربازی تورکیا لە ئیدلیب دەکوژرێن و ورەی سەربازانی ئەو وڵاتە دابەزیوە و دەبینرێت هەمبەر کوژرانی ژمارەیێک زۆر لە سەربازەکانی هێشتا هەڵمەتێکی نەداوە و ناوچەکانی ژێر کونترۆڵی ئەو گرووپانە تورکیا پشتیوانییان دەکات کەمتر دەبێتەوە.

ڕۆژنامەوانە سووریەکە وتیشی هەموو ڕۆژێک پێچەوانەی هەڕەشەکانی ئەردۆغان چەندین سەربازی وڵاتەکەی دەکوژرێن و ئەو ئیدیعایانەی کە گوایا سەربازانی سووری کوژراون دوورن لە ڕاستیەوە.

لوورنس سولەیمان ئاماژەی دا بە کەڵک وەرگرتنی حکوومەتی تورکیا لە کارتی گوشاری پەنابەران و وەبیری هێنایەوە: ئەردۆغان بە کارتی گوشاری پەنابەران داخڵی کایەکە بووتەوە بەڵام دەبینرێت ئەو سیاسەتەش شکستی هێناوە و حکوومەتی یۆنان و یەکێتیی ئەورووپا ڕێگاچارەی جیاوازیان بۆ ڕووبەڕووبوونەوەی ئەو هەموو پەنابەرە گرتۆتە پێش.

ناوبراو جەختی کردەوە حکوومەتی تورکیا لە دۆخێکی خراپدایە و کەڵک لەهەموو شتێک دەگرێت بۆ سەندنەوەی ئابڕووی خۆی لە ناوخۆ و دەرەوەی تورکیا. ئەردۆغان دەیهەوێت ئیستیفادە لە ناتۆ و ئەمەریکا و ڕووسیاش بکات بۆ چوونە دەرەوە لە گێچەڵی ئیدلیب لە حاڵێکدا کە ڕووسیا سنوورەکانی بۆ تورکیا دیاری کردووە.

ڕۆژنامەوانە سووریەکە ئاماژەی بە دۆخی بەرەکانی شەڕ لە ئیدلیب دا و ڕایگەیاند ئەرتەشی تورکیا بەشێوەی ڕاستەوخۆ بنکە سەربازییەکانی سووریا و ڕووسیا ناکاتە ئامانج بەڵکوو بە پشتگیری کردن لە هێرشی خۆمپارەیی گرووپە جیهادییەکان هەوڵ دەدات خۆی لە ڕووبەڕووبوونەوەی ڕاستەوخۆ دوور بگرێت.

ناوبراو ئاماژەشی بەو هەڕەشانەی کە ڕووبەڕوو بەڕێوەبەرایەتیی خۆسەر بووتەوە دا و وتی: شەڕێکی نوێ لە ناوچەکانی باکوور و ڕۆژهەڵاتی سووریا دوور نیە لە چاوڕوانیەوە، ئەگەری هەیە ئەردۆغان بە بیانووی ئەو شکستەی لە ئیدلیب هێناویە ژەحری خۆی بەسەر بەڕێوەبەرایەتی خۆسەردا بڕێژێت.

کۆدی هەواڵنێر: 60113